ქართულად
ჯანსაღი სასკოლო გარემო თანაბარუფლებიანობას და სასკოლო საზოგადოებას შორის დიალოგს ეფუძნება. როდესაც ვსაუბრობთ ჯანსაღ სასკოლო კულტურაზე, მოვიაზრებთ სასკოლო ცხოვრებაში თანაბრად ჩართულ მშობელს, მოსწავლესა და საგანმანათლებლო დაწესებულებას. ბუნებრივია, სკოლის მისიაა, აღზარდოს მოქალაქე, რომელიც დამოუკიდებლად გაუმკლავდება და განკარგავს საკუთარ ცხოვრებას, მომავალსა და ქვეყნის ბედს, ამ მისიის შესრულებას კი გააზრებული პასუხისმგებლობით უნდა ეკიდებოდეს სასკოლო საზოგადოების ყველა წარმომადგენელი- მასწავლებელი, მოსწავლე, სკოლის დირექცია და მშობელი.
სსიპ ქალაქ ქუთაისის N30 საჯარო სკოლა ტრადიციას არ ღალატობს და განაგრძობს სასკოლო ცხოვრებაში მშობლისა და მოსწავლის თანაბარი ჩართულობის ასამაღლებლად ფორუმ-თეატრის სახით მცირე სპექტაკლების წარმოდგენას, რომელიც, გარდა ზემოხსენებულისა, მიზნად ისახავს, დიალოგის რეჟიმში ერთმანეთს შეახვედროს სასკოლო ცხოვრების ყველა თანამონაწილე, წარმოაჩინოს სკოლაში არსებული გამოწვევები და ერთობლივად დაისახოს ამ გამოწვევებისა თუ ბარიერების გადალახვის გზები.
30 იანვარს სკოლის სააქტო დარბაზში VII, VIII და IX კლასელების ჩართულობით გაიმართა წარმოდგენა შემდეგ თემებზე: „მშობელთა მხარდაჭერა“, „კონფლიქტი მშობელსა და მასწავლებელს შორის“, „ნიშნით შეფასების პოლიტიკა“, „ტექნოლოგიების მიზნობრივად გამოყენების გამოწვევები“, „მასწავლებლისა და მოსწავლის კონფლიქტი“. თითოეული ეპიზოდის დასრულების შემდეგ, წესისამებრ, დამსწრე საზოგადოება აქტიურ კითხვა-პასუხის რეჟიმში ჩაერთო, ყველა მხარეს- მასწავლებელს, მოსწავლეს, მშობელს, დირექციას, მიეცა საშუალება, უპირველესად, ესაუბრა იმ პრობლემათა შესახებ, რომლებიც ასახული იყო ეპიზოდებში, შემდეგ კი საკუთარი ხედვა წარმოეჩინა იმასთან დაკავშირებით, თუ როგორ შეიძლება ამ გამოწვევათა დაძლევა.
მსჯელობამ მწვავედ წარმოაჩინა არაერთი საკითხი, თუმცა განსაკუთრებით გამოიკვეთა მოსწავლეთა ტექნოლოგიებზე მიჯაჭვულობის პრობლემა და ის არაჯანსაღი ჩვევები, რომლებიც მას ახლავს თან და განმსაზღვრელი შეფასების მიმართ არაერთგვაროვანი დამოკიდებულება.
ძალიან მნიშვნელოვანია იმის აღნიშვნა, რომ მსგავსი ტიპის შეხვედრები აახლოებს სასკოლო საზოგადოებას, აღვივებს თანაგრძნობისა და მადლიერების განცდას სასწავლო პროცესის თანამონაწილე თითოეული წევრის მიმართ და, რაც მთავარია, უზრუნველყოფს მოსწავლისათვის კანონით მინიჭებული უპირველესი უფლების სრულყოფას- მიიღოს ხარისხიანი განათლება.
2024 -25 სასწავლო წლის 18 დეკემბერს ჩატარდა შიდა სასკოლო ოლიმპიადის მესამე, ფინალური ტური ინგლისურ ენაში, რომელსაც ხელმძღვანელობდნენ ნათია ლომიძე და ვიკა ბებურიშვილი. მასში მონაწილეობდა ცხრა მე6 კლასელი მოსწავლე. ფინალური ტურიდან გამოვლინდა 4 გამარჯვებული: ფაილოძე დემეტრე, ბართაია ანდრია, ჩხენკელი გიორგი, ქოჩიაშვილი დავითი.
გამარჯვებული მოსწავლეები დაჯილდოვდნენ სიგელებითა და ინგლისურენოვანი საკითხავი ლიტერატურით.
